• 7. Април 2025 12:23

Компостирање – Како природата го претвора отпадот во богатство?

Органскиот отпад е сè што доаѓа од природата и може да се разгради, како што се остатоци од храна, лисја, гранки и други природни материјали. Наместо да заврши на депонии, каде што ослободува штетни гасови, тој може да се искористи на начин што ќе ѝ користи на природата.

Кога остатоците од храна, овошје и зеленчук завршуваат во корпата за отпадоци, тие најчесто одат на депонии каде што се распаѓаат без доволно кислород. Ова предизвикува ослободување на метан, гас што придонесува за климатските промени. Наместо тоа, можеме да го искористиме органскиот отпад за да добиеме нешто корисно – како компост.

Компостот е природно ѓубриво кое се добива од распаѓањето на органскиот отпад. Тој ја подобрува почвата, помага растенијата да растат побрзо и е одличен начин да се намали потребата од хемиски ѓубрива. На пример, ако секое семејство компостира остатоци од овошје и зеленчук, наместо да ги фрла, ќе се намали количеството на отпад и ќе се создаде корисен производ за градините и полињата.

Освен компостирање, органскиот отпад може да се користи за создавање енергија. Во специјални постројки, тој се претвора во биогас, кој може да се користи за греење, струја или готвење. Во некои земји, автобусите веќе користат биогас наместо обичен дизел.

Секој од нас може да помогне со едноставни чекори: да го одвојува  органскиот од друг вид отпад, да поддржува локални иницијативи за компостирање и да се обиде да фрла помалку храна. Наместо да се исфрли лушпата од банана во корпата, таа може да заврши како храна за земјата. Дури и лисјата од есенските дрвја можат да се искористат за подобрување на почвата во градините.

Ако сите заедно преземеме мали чекори, можеме да направиме голема разлика за животната средина и да создадеме почист и поодржлив свет.