• 25. Март 2025 09:20

Природата, свесноста за климатските промени и улогата на човекот

Климатските промени имаат огромно влијание врз животната средина, природата и биодиверзитетот. Промените што настануваат во природата може да бидат предизвикани од биотски и абиотски фактори, но несомнено најголемото нарушување на животната средина е предизвикано од човековите активности.

Човекот со своите активности постојано предизвикува нарушување на природата и директно влијае врз климатските промени. Ефектите од овие активности предизвикуваат деградација на животната средина и природата, која води кон загуба на биодиверзитетот, пред сѐ на значајни живеалишта, и конечно кон загуба на одредени најчувствителни видови. Биодиверзитетот е основната и најзначајна компонента за одржување на животот во природата. Сите живи организми и екосистеми се поврзани меѓу себе и секоја мала промена може да предизвика значајни промени во природата, кои понатаму водат кон други промени и негативности.

Затоа, од исклучителна важност е да се развие поголема свесност за зачувување на природата и заштита на животната средина, како и повисока одговорност за она што директно го предизвикуваме со нашето секојдневно живеење, а влијае и кон влошување на климатските промени. Потребни се постојана едукација и подигнување на јавната свест на населението, пред сѐ на најмладите, и нивно вклучување во различни активности поврзани со заштитата на животната средина и природата.

Автор: Елена Минова