Краток опис: Едукативната патека „Галичица на дланка“ се наоѓа во непосредна близина на Инфо-центарот на НПГ, во Охрид. Местоположбата на патеката е избрана со цел да биде лесно достапна за посета и е соодветно изградена за лесно качување, адаптирано на сите возрасни групи. Почетната точка на едукативната патека воедно го претставува и еден од влезовите во НПГ (Велестовски пат), продолжува до базиликата „Студенчишта“ и завршува со училницата на отворено. Вкупната должина на патеката е околу 400 м. Патеката го прати природниот релјеф, а нејзината инфраструктура е од природни и автохтони материјали. Училницата на отворено е од дрвна конструкција, опремена со кровен покривач (настрешница), масички и со седечки капацитет за околу 30 ученици (посетители). Патеката ја добива својата едукативна компонента преку поставување 11 информативни табли, за да го запознаат посетителот со локалната флора, фауна, геологија, екологија, култура и историја. Животната средина нè спојува сите нас. Сите ние го дишеме истиот воздух, растеме и живееме под истото сонце и имаме еден заеднички дом – планетата Земја. Животната средина на секој организам ја образуваат разновидни надворешни услови во местото на неговото живеење, создадено од нежива и жива природа. Тие услови постојано делуваат врз организмите и во зависност од нивното дејство секој организам мора постојано да реагира во помала или поголема мера. Сите влијанија од надворешната средина делуваат врз организмите и се означуваат како еколошки фактори, а тоа се температура, влажност, сончева светлина, кислород, јаглерод диоксид и сл. Голем дел од површината на Земјата покрива почвата која е мешавина од минерали и органски материјал. Без почва, најголемиот дел од животот на Земјата не би можел да преживее. Почвата се состои од неколку слоеви: A хоризонт (А00, А0, А1,А2), Б хоризонт и Ц хоризонт. Горе се наоѓа шумската простирка, во површинскиот слој се наоѓаат органски материи во облик на листови, гранки, плодови, семиња и сл. Потоа е подповршинскиот слој каде имаме листови и друг материјал кои подолго лежат на подлогата кои веќе се делумно раздробени, тие се потемни, но се уште може да се препоизнаат, а тука застапен е хумусот, ровка и мека маса изградена од органски материи. Потоа е слојот од раздробен материјал кој може да соджи и покрупни камења, каналчиња создадени од активното дејство на корењата од растенијата. Почвата обезбедува место за растење на растенијата и обезбедува дом за многу животни и други живи суштества. Големиот број на видови на растенија, животни, габи и микроорганизми се означуваат како бидоиверзитет. Освен живи организми под биодиверзитет се подразбира и сите видови на екосиститеми и живеалишта. Климатските промени се сериозна закана за биолошката разновидност бидејќи видовите еволуирале за да живеат на определена клима и честопати не можат да се адаптираат на повисоките температури, почестите суши и поекстремните временски настани. Токму поради овие сложени односи во екосистемите, миграцијата или исчезнувањето на некој вид неизбежно ќе ги изложи на ризик останатите видови. Националниот парк Галичица претставува „жариште“ на биолошката разновидност во Европа, но и пошироко, во глобални рамки. Паркот се издвојува од другите подрачја со слична големина по исклучителното богатство на живеалишта и видови на релативно мала територија. На површина од 24 150 ха, се среќаваат повеќе од 36 типови живеалишта, 39 растителни заедници, околу 1 600 таксони од васкуларните растенија, над 143 видови лихеноидни габи, повеќе од 480 видови габи и преку 3 230 таксони од фауната. Поминувањето време во природа и посета на заштитените подрачја овозможува кај учениците полесно да ги запознаат природните и културните вредности, да ги усовршат своите сетила и да научат да ги користат. Децата сакаат да излегуваат, да откриваат нови работи, да истражуваат и да ги користат нивните сетила за пронаоѓање. Поради несодтиг на еколошка едукација учениците не се доволно запознаени со правилата на однесување во едно заштитено подрачје, дозволени и забранети активнсоти, како и работата на вработените. Доста важни за заштитени подрачја се чуварите на паркот кои се постојано на првата борбена линија за заштита на природните и културните богатства на нашата планета. Нивната работа е исполнета со многу возбудувања и понекогаш и непријатни случувања. Работата во природа претставува уживање, но изискува и голема спремност и справување со секакви ситуации.

Ниво: III, IV

Времетраење: 180 минути

Код: ТЕР 7.4

Големина на група: 30

Средина: Лабораторија

Препорачана сезона: терен